हर हर महादेव…! तिसऱ्या श्रावणी सोमवारी ढोकेश्वरला भाविकांची मांदियाळी, महाराष्ट्राच्या विविध भागातून भाविक ढोकेश्वर चरणी

विशेष प्रतिनिधी पारनेर  /  वसंत रांधवण : तिसरा श्रावणी सोमवार असल्याने पुरातन पांडवकालीन लेणी म्हणून प्रसिद्ध असलेल्या श्री. ढोकेश्वरला हजारो भाविकांची मांदियाळी पहायला मिळाली. पहाटे तीन वाजता ढोकेश्वर मंदिरातील पिंडीला दही दुग्ध असा महाजलाभिषेक करून पुजा करण्यात आली. महाआरती करण्यात आली. यानंतर डमरू व शंखनाद करत गोसावी कुटुंबीयांच्या वतीने विधिवत साज चढवला. पहाटेपासूनच भाविकांना दर्शनासाठी ढोकेश्वर मंदिर खुले करून देण्यात आले. त्यामुळे भाविकांनी ढोकेश्वर महाराज यांचे दर्शन घेऊन मंदिर प्रदक्षिणेचा मार्ग भाविकांनी हर हर महादेव,बम बम भोलेच्या जयघोषाने मंदिर परिसर दणाणून सोडला होता.

टाकळीढोकेश्वर( ढोकी) येथे श्रावण महिन्यात तिसऱ्या श्रावणी सोमवारी हजारोंच्या संख्येने भाविक दाखल होतात. त्यामुळे ढोकेश्वरला श्रावण महिन्यात विशेष महत्त्व असते.गुरूवारी स्वातंत्र्यदिन शुक्रवारी, शनिवारी व रविवारी ह्या चारही दिवशी श्री क्षेत्र ढोकेश्वर येथे गर्दी पहायला मिळाली. ह्या चार दिवसामध्ये हजारो भाविकांनी पवित्र अशा पिंडीचे दर्शन घेतले.

यावेळी विविध धार्मिक कार्यक्रमांचे आयोजन करण्यात आले होते. परंतु या वर्षी दुष्काळी परिस्थिती असुनही यात्रेमध्ये विविध खेळणी,पाळणाघरे,खाऊची दुकाने, संसारोपयोगी वस्तू खरेदी करण्यासाठी भाविकांनी मोठ्या प्रमाणात गर्दी केली होती. तिसरा श्रावणी सोमवार व त्यामध्ये रक्षाबंधन हा सण आल्यामुळे दिवसभर महाराष्ट्राच्या कानाकोपऱ्यातून भाविक भक्त हजेरी लावली होती. यात्रेनिमित्त जंगी कुस्त्यांचा आखाडा भरविण्यात आला होता पण पावसाने हजेरी लावल्यामुळे यात्रेमध्ये एकच धावपळ उडाली होती. पावसामुळे आखाडा रद्द करण्याची वेळ यात्रा कमिटीवर आली.

भाविकांसाठी २१ क्विंटल खिचडी महाप्रसाद

श्री क्षेत्र ढोकेश्वर यात्रेच्या निमित्ताने टाकळीढोकेश्वर ग्रामस्थांनी विशाल भंडाऱ्याच्या माध्यमातून २१ क्विंटल खिचडी महाप्रसादाचे आयोजन केले होते. या खिचडी महाप्रसादाचे टाकळीढोकेश्वर ग्रामस्थांनी चांगल्याप्रकारे नियोजन केले होते. या विशाल भंडाऱ्याचे हे या वर्षी १६ वे वर्ष पूर्ण झाले.