श्री क्षेत्र माळवाडी पडवी येथे दत्त जयंती सोहळा उत्साहात संपन्न

दौंड प्रतिनीधी / नितीन पाटूळे : श्री क्षेत्र माळवाडी पडवी, तालुका दौंड, जिल्हा पुणे येथे सालाबादप्रमाणे याही वर्षी दिनांक १४/१२/२०२४ वार शनिवार दिवशी प.पू.सद्गुरु श्री आण्णा महाराज रंधवे यांच्या मार्गदर्शनाखाली श्री दत्त जयंती सोहळा उत्साहात साजरा करण्यात आला. दत्तजयंतीनिमित्त श्री क्षेत्र माळवाडी पडवी येथे विविध कार्यक्रमांचे आयोजन करण्यात आले होते. यामध्ये श्री गुरुचरित्र पारायण सप्ताह करण्यात आला होता. या पारायण सोहळ्यात विविध भागातून आलेल्या भाविकांनी सहभाग घेतला होता. शनिवार सकाळी ७.वा.श्री दत्त महाराज यांची आरती करण्यात आली. स.७ ते९ गुरुचरित्र पारायण समाप्ती व श्री सत्यनारायण पूजा करण्यात आली नंतर स. ९ ते ११ दत्त जयंती निमित्त अभिषेक करण्यात आला. त्या नंतर ११ ते १ वाजेपर्यंत श्री दत्तयाग व होमहवन चा कार्यक्रम आयोजित करण्यात आला. दुपारी २ ते ४ वाजेपर्यंत पंचक्रोशीतून आलेले भजनी मंडळी यांनी हरिभजनाचा कार्यक्रम साजरा केला.

दुपारी ४ ते ६ वाजेपर्यंत हे.भ.प.प्रा.नवनाथ महाराज माशेरे यांचा किर्तनाचा कार्यक्रम सादर झाला. सर्व भाविक भक्तांनी या किर्तनाचा आनंद घेतला. सायं .६.०३ मि.श्री दत्त जन्म मोठ्या थाटामाटात व उत्साहाने साजरा करण्यात आला. सायं ७.वाजता महाप्रसादाचे वाटप करण्यात आले. हजारो भाविकांनी या महाप्रसादाचा लाभ घेतला. मानवी जीवनात गुरूंचे स्थान किती महत्त्वाचे आहे हे या कार्यक्रमात बोलताना माशेरे महाराज यांनी पटवून सांगितले.आई वडिलांची आणि गुरुंची सेवा केल्यास देव सुद्धा भक्तांच्या हाकेला धावून येतो असे यावेळी बोलताना सांगितले. या सर्व कार्यक्रमाचे नियोजन आणि आयोजन श्री दत्त औदुंबर सेवा संस्था व श्री दत्त सेवेकरी मंडळी यांनी व्यवस्थीतरित्या पार केले. श्री क्षेत्र माळवाडी पडवी येथे विविध भागातून आलेल्या भाविकांनी श्री दत्त महाराज व सद्गुरू श्री आण्णा महाराज यांचे दर्शन घेऊन आशिर्वाद घेतला.या कार्यक्रमानिमित्त महाराष्ट्र आणि इतर राज्यातून आलेल्या भाविकांनी श्री दत्त महाराज व सद्गुरू श्री आण्णा महाराज यांचे दर्शन घेऊन आशिर्वाद घेतले.