प्रतिनिधी / इनायत आत्तार : मुस्लिमांचा सर्वात मोठा सण असलेली रमजान ईद काल शहर व तालुक्यात उत्साहपूर्ण वातावरणात साजरी करण्यात आली. यानिमित्त ईदगाह मैदान व जामा मशीद तसेच शहरातील अनेक मशिदींमध्ये मुस्लिम बांधवांनी ईदची नमाज अदा केली. सर्वत्र उत्साहपूर्ण वातावरणामध्ये हिंदू-मुस्लिम बांधवांनी एकमेकांना रमजान ईद व अक्षय तृतीयाच्या शुभेच्छा दिल्या.
ईदगामध्ये शहर काजी मौलाना अकबर अली यांनी, या देशांमध्ये सुख, शांती, समृद्धी नांदू दे. सर्वांच्या समस्या दूर होऊ दे आणि एकोपा आणि भाईचारा निर्माण होऊ दे, अशी प्रार्थना केली.
जामा मशीद व ईदगाहमध्ये प्रदेश राष्ट्रवादीचे सरचिटणीस अविनाश आदिक, माजी आ. भाऊसाहेब कांबळे, माजी उपनगराध्यक्ष करण ससाणे, युवा नेते सिद्धार्थ मुरकुटे, माजी नगरसेवक अशोक कानडे, सचिन गुजर, ज्ञानेश्वर मुरकुटे, हेमंत ओगले, संजय छल्लारे, लकी सेठी, दीपक कदम, जयंत चौधरी, भाऊसाहेब मुळे, विजय खाजेकर, तहसीलदार राजेंद्र वाकचौरे, डिवायएसपी संदीप मिटके, मुख्याधिकारी गणेश शिंदे, पोलीस निरीक्षक हर्षवर्धन गवळी, नाना पाटील, महेंद्र त्रिभूवन, किशोर त्रिभूवन, संदीप मोकळ, अरुण मोकळ, तलाठी राजेश घोरपडे आदींसह मान्यवर उपस्थित होते. सर्वांनी मुस्लिम बांधवांना ईदच्या शुभेच्छा दिल्या.
आगामी नगरपालिकेची होऊ घातलेली निवडणूक पाहता या वर्षी ईदच्या शुभेच्छा देण्यासाठी विविध राजकीय पक्षांमध्ये शुभेच्छा फलकांची स्पर्धा दिसून आली. नमाजनंतर सर्वांनी एकमेकांना आलिंगन देऊन ईद मुबारक म्हणत शुभेच्छा दिल्या. पोलीस खात्यातर्फे चोख बंदोबस्त ठेवण्यात आला होता.
जामा मशीदमध्ये डॉ. राज शेख, नगरसेवक मुख्तार शाह, रज्जाक पठाण, तनवीर रजा, जावेद शेख यांनी स्वागत केले. महिनाभर रमजाननिमित्त रमजान, कुरआन व इस्लाम धर्माबद्दल मौलिक माहिती प्रसारित केल्याबद्दल ज्येष्ठ पत्रकार सलीमखान पठाण यांचा जामा मशीद ट्रस्टतर्फे सत्कार करण्यात आला. मौलाना मोहम्मद ईमदादअली यांनी धार्मिक प्रवचन दिले तर मुफ्ती अतहर हसन यांनी नमाजची ईमामत केली. ईदगामध्ये मुफ्ती रिजवानुल हसन शेख यांनी धार्मिक प्रवचन दिले. नमाजची इमामत मौलाना सय्यद अकबर अली काझी यांनी केली. याप्रसंगी लखनौ येथील मदरसा नदवातुल उलेमाचे मुफ्ती अब्दुल्लाह मखदुम हुसेन यांची प्रमुख उपस्थिती होती. ईदगाह ट्रस्टचे अध्यक्ष मुजफ्फर शेख व त्यांच्या सहकार्यांनी मान्यवरांचे स्वागत केले. नमाज नंतर सर्व हिंदू-मुस्लिम बांधवांनी एकमेकांना शुभेच्छा दिल्या. राजकीय पक्षाच्या नेते मंडळींनी शहरातील मुस्लिम कार्यकर्त्यांच्या घरी भेटी देऊन शुभेच्छा दिल्या.
पोलीस विभागातर्फे सर्व मुस्लिम बांधवांना गुलाब पुष्प देऊन ईद मुबारक म्हणत स्वागत करण्यात आले. पोलीस उपअधीक्षक संदीप मिटके, पोलीस निरीक्षक गवळी व त्यांचे सर्व सहकारी यांनी उपस्थित मुस्लिम बांधवांना गुलाब पुष्प दिले. नगरपालिकेतर्फे यावेळी पाण्याची व्यवस्था करण्यात आली होती. ईदगाहभोवती चोख पोलीस बंदोबस्त ठेवण्यात आला होता.
