श्रीरामपूर प्रतिनिधी / जितू शिंदे : महसूल खात्याने जप्त केलेली वाळू रात्रीतून पळविण्याचा प्रकार श्रीरामपूर तालुक्यातील भेर्डापूर येथे घडला. वाळू पळवित असताना कारवाई करण्यासाठी गेलेल्या महसूल पथकावर वाळू तस्करांनी विटा आणि दगडांनी प्राणघातक हल्ला केला. या हल्ल्यात तलाठी शिवाजी दरेकर गंभीर जखमी झाले तर मंडलाधिकारी बाळासाहेब वायखिंडे आणि तलाठी बाळासाहेब कदम यांनाही मार लागला आहे. याप्रकरणी तालुका पोलीस ठाण्यात गुन्हा दाखल करण्यात आला आहे. या घटनेच्या निषेधार्थ तलाठी व मंडलाधिकारी संघटनेने कामबंद आंदोलन पुकारले.
बुधवारी रात्री 9 वाजेच्या सुमारास महसूल पथकाने पकडलेली वाळू कुणीतरी डंपरमध्ये भरत असल्याची माहिती एकाने नायब तहसिलदार राजेंद्र वाकचौरे यांना दिली. त्यांनी तातडीने श्रीरामपूर तालुका पोलिसांना माहिती देत महसूलचे पथक भेर्डापूरकडे रवाना केले. त्यात उंदीरगावचे सर्कल बाळासाहेब वायखिंडे, तलाठी बाळासाहेब कदम आणि शिवाजी दरेकर यांचा समावेश होता. पोलिसांनी या पथकाला तुम्ही पुढे जा आम्ही नंतर येतो, असे सांगितले. महसूल पथक पोहोचल्यानंतर काही लोक डंपरमध्ये वाळू भरत असल्याचे दिसले. त्यांच्याकडे चौकशी करताच ते पळून गेले. याची माहिती महसूल पथकाने तहसिलदारांना दिली.
नायब तहसिलदार वाकचौरे यांनी तालुका पोलिसांना तातडीने घटनास्थळी जाण्यास सांगितले. पोलीस येण्याच्या आधीच एका जीपमध्ये काही लोक तेथे आले. जीप काही अंतरावर लावून ते महसूल पथकावर चालून आले. महसूल पथकातील कर्मचार्‍यांना त्यांनी शिवीगाळ व धक्काबुक्की सुरू केली. काहींनी विटा तसेच दगडाने मारहाण केली. डंपरची चावी शिवाजी दरेकर यांच्याकडे होती. त्यांना जबर मारहाण करून चावी त्यांच्याकडून हिसकावून घेतली. त्यांचा आरडाओरडा ऐकून परिसरातील नागरिक जमा झाले. त्यांनी महसूल पथकाला हल्लेखोरांच्या तावडीतून वाचविले. महसूल पथक श्रीरामपूरकडे रवाना झाले. त्यानंतर पोलीस घटनास्थळी पोहोचले. हरेगाव येथील अ‍ॅट्रॉसिटीच्या घटनेच्या पार्श्वभूमीवर बंदोबस्तामुळे पोलिसांना घटनास्थळी जाण्यास उशीर झाल्याचे सांगण्यात आले.
दरम्यान हल्लेखोरांनी डंपर पळविला. या घटनेमुळे वाळू तस्कर कोणत्याही थराला जावू शकतात याचा प्रत्यय काल आला. याप्रकरणी श्रीरामपूर तालुका पोलीस ठाण्यामध्ये गुन्हा दाखल करण्यात आला आहे. जखमी शिवाजी दरेकर हे पढेगाव येथील तलाठी आहेत. तर बाळासाहेब कदम मालुंजे येथील तलाठी आहे. भेर्डापूर कदम यांच्या हद्दीत येते.
दरम्यान, या घटनेची माहिती तालुकाभर पसरली. या घटनेचा अनेकांनी निषेध केला. महसूल कर्मचार्‍यांवर झालेल्या या हल्ल्यामुळे श्रीरामपूर तहसिल व प्रांताधिकारी कार्यालयात काम बंद आंदोलन करण्यात आले. महसूल विभागाच्या सर्वच कर्मचार्‍यांनी या घटनेचा निषेध केला. गुन्हा दाखल झाला असला तरी हल्लेखोर कोण? हे अद्याप समजलेले नाही. तसेच श्रीरामपूर तलाठी व मंडलाधिकारी संघटनेने या घटनेतील आरोपी जेरबंद होईपर्यंत कामबंद आंदोलन पुकारले आहे.
यामध्ये गुन्हेगार अटक होत नाही तोपर्यंत काम बंद आंदोलन सुरु राहील, यापुढे गौण खनिज उत्थखनन करणार्‍या पथकास शासकीय वाहन व वाहन चालक, कोतवाल, तहसिल कार्यालयातील एक कर्मचारी, अधिकारी, तलाठी व शस्त्रधारी पोलीस असे किमान सहा ते सात अधिकारी व कर्मचारी सोबत असावेत आदी मागण्या त्यांच्यावतीने करण्यात आल्या आहेत. या आंदोलनात तलाठी आ.एम.घोरपडे, एन.व्ही.नागपुरे, ए.जे.तेलतुंबडे, एस.ए.लाचोरे, बी.के.मंडलिक, बी.एस.वायखिंडे, पी.एस.ओहोळ आदींसह इतर कर्मचार्‍यांनी सहभाग घेतला होता.
Leave a reply
