गोदापात्रातुन अवैध वाळू वाहतूक करण्यासाठी सुरू असलेला रस्ता बंद करण्यासाठी सरसावले नाऊरचे ग्रामस्थ, रात्री ग्रामसभा घेऊन प्रशासनाला दिले निवेदन

विशेष प्रतिनिधी /इनायत अत्तार  : श्रीरामपूर तालुक्यातील नाऊर पुलालगत असलेल्या गोदावरी नदी पात्रातून अवैध वाळू उपसा करण्याच्या हेतुने नदीजवळच्या एका शेतकऱ्याच्या शेतातून रस्ताचे खोदकाम सुरू असतांना गावातील सुमारे ७०० ते ८०० तरुणांनी या रस्त्याचे काम बंद करून तत्पर ग्रामसभा घेत यासंदर्भात ठराव घेऊन जिल्हाधिकारी आणि पोलिस उपाधीक्षक यांना देण्यात आले आहे.

श्रीरामपूर – वैजापूर ला जोडणाऱ्या गोदावरी नदीवर असलेल्या पुलाजवळ एका शेतकऱ्याच्या शेतातून नदीपात्राकडे जेसीबी मशिन च्या साह्याने अवैध वाळू उपसा करण्यासाठी रस्ता तयार करण्याचे काम सुरू होते. या रस्त्याचे काम काही ग्रामस्थांच्या लक्षात आल्याने ही वार्ता कानोकानी सह सोशल मिडियाच्या माध्यमातुन काहीच वेळात गावभर पसरली. गावातील अनेक तरुण, पदाधिकारी, ग्रामस्थ यांनी नदीपात्राकडे कुच करून संबंधित वाळू तस्कर यांना अवैध वाळू उपसा करून देणार नसल्याचा इशारा देत जेसीबी काढून घेण्याची सुचना केली असता संबधित वाळू तस्करांनी दमबाजी करत ही शेती विकत घेतली असुन तुमचा काही संबंध नाही अशी भूमिका घेतली मात्र तरीही ग्रामस्थ आणि तरुणानी गाव करेल ते राव करेल का ही पद्धत अवलंबल्याने वाळू तस्करांनी माघार घेत JCB काढून घेतला.

दरम्यान या घडामोडीनंतर मोठी ग्रामसभा पार पडली यामध्ये हजारो महिला – पुरुष ग्रामस्थ यांनी अवैध वाळू तस्करीला तीव्र विरोध दर्शवत गावातूनच नव्हे तर लगत गोदापात्रातून एकही वाळूचा खडा उचलुन न देण्याची शपथ घेत कोणताही तस्कर वाळू नेण्याचा प्रयत्न केला तर सर्व वाहने अडवून महसुलमंत्री राधाकृष्ण विखे पाटील येईपर्यंत अवैध वाळू वाहतूक करणारे वाहने अडवून ठेवण्याचा इशारा देण्यात आला.

या संदर्भात विशेष ग्रामसभा घेण्यात आली असून निवेदनानुसार श्रीरामपुर परिसरातील काही गुन्हेगारी पार्श्वभूमी असलेल्या गुंडाकडून वाळू तस्करीसाठी रस्ता करण्याचा प्रयत्न करत असतांना ग्रामस्थानी अडवले असुन भविष्यात हेच वाळू तस्कर गावातील काही व्यक्तीना / तरुणांना त्रास किंवा दमबाजी करण्याची शक्यता असून यांचा त्वरीत बंदोबस्त करून कायदा व सुव्यवस्था राखण्यासाठी प्रयत्न करण्याची गरज असल्याचे ठरावाद्वारे मांडण्यात आले आहे. या निवेदनाच्या प्रती महसुलमंत्री तसेच पोलिस अधीक्षक , जिल्हाधिकारी, पोलिस उपाधिक्षक, प्रांताधिकारी तसेच श्रीरामपुर व वैजापूर पोलिस ठाण्यांना दिले आहे.